ଶତାବ୍ଦୀ ଧରି ଇଂରାଜୀ ଭାଷାରେ "Man" ଏବଂ "Mankind" ଶବ୍ଦକୁ ସମଗ୍ର ମାନବଜାତିର ପ୍ରତୀକ ଭାବେ ବ୍ୟବହାର କରାଯାଉଥିଲା। କିନ୍ତୁ ଇତିହାସବିଦ୍ ଓ ଭାଷାବିଦ୍‌ମାନଙ୍କ ମତରେ, ବାସ୍ତବରେ ଏହି ଶବ୍ଦଗୁଡ଼ିକ ଦୀର୍ଘ ସମୟ ଧରି ନାରୀଙ୍କୁ ଭାଷା ଓ ସାମାଜିକ ପରିଚୟରୁ ବାଦ ଦେବାର ଏକ ମାଧ୍ୟମ ହୋଇ ରହିଥିଲା। ଆଜି ଲିଙ୍ଗ ସମାନତାକୁ ନେଇ ବିଶ୍ୱବ୍ୟାପୀ ଆଲୋଚନା ବଢ଼ୁଥିବା ବେଳେ ଏହି ଐତିହାସିକ ପ୍ରସଙ୍ଗ ପୁଣିଥରେ ଚର୍ଚ୍ଚାରେ ଆସିଛି।                                                            କାନାଡାର ଇତିହାସବିଦ୍ ଜ୍ୟାକଲିନ୍ ମରେଙ୍କ ମତରେ, "Man" ଶବ୍ଦର ଅର୍ଥ କେବଳ ପୁରୁଷ ନା ମାନବଜାତି—ଏହାକୁ ନେଇ ମଧ୍ୟଯୁଗରେ ମଧ୍ୟ ବ୍ୟାପକ ବିତର୍କ ହୋଇଥିଲା। ସେହି ବିତର୍କ କେବଳ ଭାଷାରେ ସୀମିତ ରହିନଥିଲା, ବରଂ ସମାଜରେ ନାରୀଙ୍କ ସ୍ଥାନ ଓ ଅଧିକାରକୁ ମଧ୍ୟ ପ୍ରଭାବିତ କରିଥିଲା।  ବାଇବେଲର Genesis ଗ୍ରନ୍ଥରେ ମଣିଷ ସୃଷ୍ଟିକୁ ନେଇ ଦୁଇଟି ଭିନ୍ନ ବର୍ଣ୍ଣନା ରହିଛି। ପ୍ରଥମ ବର୍ଣ୍ଣନାରେ ଭଗବାନ ପୁରୁଷ ଓ ନାରୀଙ୍କୁ ଏକାସାଙ୍ଗରେ ସୃଷ୍ଟି କରିଥିବା କୁହାଯାଇଛି। କିନ୍ତୁ ଦ୍ୱିତୀୟ ବର୍ଣ...